मेरो कविताको शिर्षक तिमी
तिमीले रचेको सुन्दर कविताको पात्र तिमी
तिम्रो कथा, तिम्रो व्यथा
र तिमीले बुन्दै गरेको
कथाको मुख्य पात्र तिमी
म र तिमी
म त केवल तिम्रो कथालाई नियालेर हेर्ने पात्र
एक दर्शक
न त म तिम्रो कथाको मर्मलाई बुझ्न सक्छु
न त तिम्रो कथाको भावनालाई अंगाल्न
मेरो भूमिका यत्ति मात्र छ
म केवल तिम्रो कथा नियालेर हेर्न सक्छु ।
जीवनको हरेक पाइलामा
सानो सानो खुसीलाई बटुल्दै
तिमी बुन्दै छौ तिम्रो सोच
जसले तिम्रो कथालाई नयाँ जीवन दिनेछ ।
यो समय,
तिम्रा सङ्घर्षहरू र तिम्रा सुख-दुःख
अनि तिमीभित्र लुकेका हजारौं प्रश्नहरू.…
सायद जिन्दगीको कुनै मोडमा
तिमीले ती सबैको उत्तर भेट्नेछौ
जसले तिमीलाई जीउनुको अर्थ सिकाउनेछ
तिम्रा अधुरा कथाहरूले नयाँ जीवन पाउनेछन्
र मजस्ता कैयौँ दर्शकहरूले
तिम्रो कथालाई पूर्ण बनाउनेछन् ।
यी सबै भविष्यमा आउने परिवर्तनहरू हुन्
तर मुख्य कुरा
तिमी तिम्रो वर्तमानको कथा बुन्दै गर
नया बुट्टा भर्दै जाउ
तिमी भित्रको कथालाई
एउटा नयाँ आयाम देऊ ।
म तिम्रो कथालाई सधै नियालेर हेरिरहनेछु
र, तिम्रो कथालाई पूर्ण बनाउन
साथ दिरहनेछु ।