मेरो जीवनका सुख–दुःखलाई
किताबका पानाहरूमा कोर्दै गर्दा
कुनै दिन मेरा शब्दहरूले
तिम्रो वर्णन गर्नेछन् ।
मैले लेखेका हरेक शब्दमा
तिमी बाँचिरहनेछौ,
म तिमीभित्र असीम स्मृति बनेर बस्नेछु ।
मैले कोरेका शब्दहरूले
अतीतका पलहरूलाई फेरि जागाउनेछन्,
लाग्छ त्यो पल सधैं तिमी संगै नै थियो
जसको कुनै समय थिएन ।
मात्र तिमी थियौ
अनि तिमीले महसुस गरिरहेका पलहरू ।
सायद ती शब्दहरूलाई तिमीले स्पर्श गरिरहँदा
तिम्रा आँखाबाट बग्ने
ती दुई थोपा आँसुहरूले
मलाई सधैंका लागि जीवित बनाइरहनेछ ।
म तिम्रो जीवनमा सधैं मिठो मुस्कान बनेर बाँचिरहनेछु ।